2019年4月8日

換完機油返度屋企已經八點幾,啱坐低發現個耳機已經細聲度幾乎聽唔度,唔得嘞真係要換喇呢次。睇下手機,已經八點半有多,街口嘅Dollarama應該九點鐘先閂(刪)鋪,宜家行過去都仲嚟得及。於是乎急急腳咁走去廚房熄火,揦起件褸再換對波鞋,喺個袋度摷埋個銀包,跟著就出門口喇。

上著斜坡,啲風吹埋嚟,我都係要翹(橋)起雙手咁行,如果唔係仲係覺得有啲凍。

我真係好耐冇行過呢條路喇。諗返起舊年都係差唔多時間嚟咗多倫多,跟著就到咗夏天。嗰陣又未有車,每晚得個「行」字,行勻附近幾條街,真係唔方唔係「行勻九條街」。話咁快又一年嘞。

Dollarama真係未關門喎,不過等畀錢條隊都排度有啲長喇。我嗰日車上條USB線壞咗嚟呢度買新嘅,好似唔覺意有見度買耳機嘅。行度買數據線嗰頭,啊又真係有喎!仲要係五顏六色,但係連唔連度我嘅TV先?自從我嘅手提神神哋(應「侲侲哋」為正字?)之後,日日都要戴耳機先聽度聲嚕……

揀邊款好呢?咦?呢個可以連落個TV度嘅喎,我摞起嗰款有個TV logo仔喺上面嘅盒。仲要係立體聲耳機噃(播)……乜話?!先四蚊?得唔得㗎?

就咁樣糾(陡/九)纏咗一陣,都係揀佢喇。仲(應「重」為正字)有覺得驚訝嘅就係,依家(應「而家」為正字)Dollarama已經開始有四蚊嘅嘢賣喇?雖然我知道耳機係要貴啲嘅……

畀完錢,就咁摞著個盒行返屋企。頭先仲有少少透光嘅藍色天空,宜家(應「而家」為正字)已經黑晒。落著斜坡,望下天空,今晚係彎月喎,仲(應「重」為正字)有幾粒星星。行下又望下,好似又多咗幾粒。個月亮啱好係啲電線中間,好似五線譜上嘅音符咁。等我計下先……又唔係全音符,又冇條尾……唔諗喇!

我就咁中(應「舂」為正字)下中下,中返屋企嚕。戴著個耳機煲咗兩集劇,啲音質唔錯吖:)

 

2019年4月7日

我一起床就諗返起琴晚寫嘅嗰一細段文,當時我喺度搵「一浸味」嘅「浸」係咪正字呢?當時我搵度兩個講法,一個就話就係古文裡面「祲」字嘅延伸或演變;「祲」表不祥之氣,妖氣。而第個講法就係:應該「陣」為正字,但喺因為通常都係「一陣味」連埋一起講,所以本身尾音發「-n」嘅「陣」,俾「味」嘅聲母「-m」同化,所以「陣」讀起身就好似「浸」。

我當時選擇咗接受第一個講法,因為我覺得「祲」同後面嘅「味」有意思上嘅關聯。但係今朝醒咗,訓喺張床度,我就喺度諗,其實喺英文裡面,都有好多因為咁樣連埋一起讀,所以個單詞會變咗唔同嘅讀音。就摞最簡單嘅「thank you」嚟講吖,「you」聽起身似粵語發音嘅「橋」。咁我又諗起,喺Mandarin入面,「一股味」等同於Cantonese裡面嘅「一陣味」,「股」係個量詞,所以「陣」作為量詞,講「一陣味」都解釋得通吖。

睇嚟……Cantonese同English有異曲同工之妙哈(hah)?

講度呢度,我又諗起另外一個我成日都會講度嘅「琴晚」。但係我身邊有唔少嘅朋友,係講「尋晚」;而我第一次見度呢個意思嘅詞,係喺《明報》19年,應該係1月16號嗰期報紙上面。點解我咁清楚記得?因為我有影低篇新聞,仲發咗上我啲社交軟件度添。當時篇新聞嘅標題係「柯創盛轟羅致光「四個大字,不食人間煙火」」,跟著個導語就寫到「……噚日唔少建制派議員就喺福利事務委員會會議輪流向勞工及福利局長羅致光開火……」喺呢句話裡面,作者用度嘅喺「噚」。

其實我都有嘗試去上網搵過啲解釋,佢就好似「一陣味」咁,變成咗「一浸味」。喺古語中,有一個詞叫「昨暝日」;「昨」、「暝」兩字合音,「昨」字加強,而「暝」就得番聲母「-m」,所以讀下讀下,咪變咗「噚/尋」咯。至於「琴」……當你一個「今日」接住一個「今日」咁日講夜講,再讀「噚/尋」呢個齒擦音,都變咗舌根音「琴」囉。

有人話,提到過去嘅一日,就好似喺度尋找一樣嘢噉,即係「尋找過去嘅一日吖」!噉,「琴日」又點解釋吖?俾兩隻「王」壓住咗,「今日」咪變「琴日」咯!

後面呢個我作嘅 :p

 

2019年4月6日

一開房門,嗰浸(應「祲」為正字)報紙嘅油墨味喺噉湧埋嚟。頭先出門口,盞檯燈冇熄度,報紙㨴(乾)咗幾頁就噉擠(劑)喺度(/響度),飲完湯隻碗,擺咗喺另外一邊沓嘢上面。

其實……我幾鍾意聞報紙呢浸味㗎~

2019年4月5日

晏晝去完個Interview就返咗屋企,換對波鞋,跟住又出街送餐嚕。今日個Interview前前後後差唔多用咗兩個鐘頭,你係咪奇怪點解要咁耐呢。雖然係用咗好耐,但係我會有種無憾嘅感覺。當然唔係因為兩個鐘嘅面試令我失去咗對呢份工嘅興趣,亦都唔係因為我好有信心人地會選擇我,而係因為……喺呢兩個鐘頭裡面,模擬實操畀咗一個機會我,令我充分噉表達咗我會點樣詮釋呢一份工作。就算最尾人地唔要我,我都心服口服,因為今日人地睇度嘅,已經係我能力所在。

我哋先係相互咁交流咗下,發現大家嘅理念比較吻合,你都可以話係我對呢份工嘅工種理解正確喇。諗番起我前boss仲叮囑我記得要同人好傾啲,當時我心裡面都幾擔心自己。

人哋話,「不如你講下自己吖。」

「我係學攝影嘅。大概舊年三月份我嚟咗多倫多呢邊做嘢。一開始都係從事同攝影相關嘅工作,後來去咗報社做嘢,發現自己對寫嘢相當有興趣。……無論係鍾意影相抑或係寫字,都係可以表達自己嘅一種方式。我有喺網上睇過你哋啲節目。我比較鍾意關注民生,同埋啲環保話題,所以我就揀咗兩個視頻嚟睇。我覺得咁樣一個參與製作節目嘅一部分,都係喺度表達緊自己。就好似點解話我會揀呢兩個視頻嚟睇,就係因為我想關注呢兩個主題。」

「到時你需要自己去搵材料,要錄音,把聲會出街嘅喔。」話完,佢摞起檯上嘅紙,要我試下讀出嚟。上面啲行文用詞就正如我宜家寫嘅嘢咁,你可唔可以想象度,我嗰一刻,係几咁嘅驚喜?

我有點矜持唔住,我指住紙上啲字,同佢講,「我最近都喺度學如何正確寫粵語口語用詞,對發音都要好關注。我好有興趣。」

於是乎我哋嚟度第間房仔,好細喀(ka, 應「格」為正字)嘅位,淨係擺度兩張凳。可能因為房仔裡面淨係得埲墻上有少少昏黃嘅燈光,坐喺裡面唔覺得逼狹(gip),反而覺得平靜,几適合錄音同剪片。我就喺裡面讀完紙上啲句子,跟住又睇咗個視頻,用手機個Note寫咗一段話出嚟。

大概四十五分鐘度,當時得我一個喺房仔度。我背對住度玻璃趟門,揸住個鼠標係咁喺度撳暫停/播放,來來回回咁拉條進度條,聽受訪者講嘅嘢,寫低啲自己認為重要嘅信息,完全聽唔度外面嘅聲,一直到我寫完拉開個趟門。

呢種感覺……我已經好耐冇經歷過喇。唔嘈吵,唔緊張,唔會無端白事發脾氣。

後來傾度薪酬,「我哋唔係斷(段)鐘計嘅喎,我哋係一個故仔一個故仔噉計嘅。」

我喺度諗,噉咪好似畫家噉?啲畫係一幅一幅噉計,有啲賣度好貴。噉我啲故仔呢?會唔會越嚟越貴㗎?笑

 


 

你睇下:)

 

 

8C949254-683C-44EF-9629-4EED88205044